傳奇功夫巨星李小龍係全球唔少功夫迷嘅超級偶像，但你哋又知唔知，李小龍嘅偶像係邊個呢？佢就係著名武術家蔡雲龍喇。

蔡雲龍同李小龍雖然無見過面，但兩人係同月同日出世，同係屬龍，仲同樣對武術都有一份執著。據香港媒體報道，李小龍曾經買過好多武術書返去研究，當中就有蔡龍雲寫嘅《武術運動基本訓練》同《華拳》，據講《武術運動基本訓練》呢本書仲被李小龍擺喺床頭，成日拎嚟睇。李小龍根據書入面嘅指引練習，特別加強腰、腿嘅訓練，令腳法運用更加自如。李小龍嘅電影入面，有個連踢三腳唔落地嘅動作，報道話正正係根據蔡龍雲著作《華拳》嘅「三不落地」動作所改。

講返蔡雲龍本人先，佢出身武術世家，父親係當年打遍山東無敵手嘅拳師蔡桂勤，蔡雲龍自4歲起就跟爸爸習武，9歲果陣拳法已經相當純熟。上海當時有一班西洋拳擊手輕視中國武術，話中國功夫係「花拳繡腿」，於是就喺1943年，正式向中國武術界提出對抗表演賽嘅邀請，蔡桂勤等人就選咗8位選手代表中國武術界決鬥。果陣只得15歲嘅蔡龍雲就作為中方年紀最細嘅選手應戰，蔡雲龍嘅對手就係年紀同身形都比佢大一倍嘅俄羅斯知名拳手馬索洛夫，但蔡雲龍一啲都唔怯，佢後嚟講返，話自己初生之犢不畏虎，「打就打」。

剛上到場，裁判示意兩人到擂台中央，蔡雲龍一拳打過去，馬索洛夫一閃，然後呆咗，外國人裁判、觀眾陸續笑咗，點解？蔡雲龍唔熟悉西方拳賽規例，原來當時未宣佈開始。去到比賽一刻，蔡雲龍話對方打得好惡，兼夾拳快，不過蔡雲龍利用自己靈活嘅優勢，於馬索洛夫出拳時，從馬索洛夫胳肋底下鑽到對方背後再鉤腳，令馬索洛夫轟然倒下，蔡雲龍趁對方起身、手部離地又未完全企穩之際，再出多招，最終取得勝利，中方結果以5勝2負1平嘅成績大敗西洋隊。經此一役，蔡雲龍嗰名轟動成個上海，被武術界賦予「神拳大龍」嘅稱號。

原圖嚟自網絡。